Ad Hoc Club (14) 朱古力伯爵紅茶煙燻銀鱈魚

 “朱古力” 巧多人都鐘意食, 仙女都唔例外.  禾怕甜, 只喜歡黑朱古力,  亦喜歡有果仁或酒心既,  一顆顆小巧精緻, 食完開心哂.  甜品方面,  如果全部用上朱古力對禾就太甜太膩了, 很喜歡配搭上”莓莓”類別既餅食,  酸酸甜甜夾得好完美, Yummy!

今次Ad Hoc Club功課係Yumi  出的題目, 坦白講甜品禾係好難有心得同大家分享, 只怕要撞幾次板先有D野可以上檯 L     所以, 朱古力都係要入膳先得 xddddd   食譜書睇左一大堆, 食譜網亦逛了不少,  用上朱古力的菜式很少見, 唯一比較近磅既係 “Food Network.com” 見到既烤牛柳配上一個以紅酒+朱古力+Rosemary既sauce.  但係呢個組合感覺上好難食出任何朱古力味道 (紅酒應該蓋過哂, Rosemary亦係搶味既香料)

胡思亂想之下, 想起一次係”呀信屋” 買過一罐 “朱古力紅茶” 飲品, 係日本Aishi下面Fauchon的出品, 味道出奇的討好+舒服, 係淡淡的紅茶配上朱古力味, 二者之間誰亦搶不了誰.  所以今次Ad Hoc Club 就係仙女的實驗室, 以”朱古力+紅茶” 整D野 wakakakaaaa, 百分之一百原創架.

Ad Hoc Club (14) 朱古力伯爵紅茶煙燻銀鱈魚

材料:

銀鱈魚2片(每片約80-100g), 伯爵茶葉5g, 朱古力粉15g, 蜜糖

今次使用的伯爵茶葉係之前跟”胡李媽媽”其中一期Ad Hoc Club的菜式”茶香牛面肉”買的, 果次牛面肉整個醃法都跟足胡李媽媽做法, 但仙女自己轉左煮法, 放入焗爐慢煮 (100度, 5小時), 效果一流呀, 又淋又滑又入味. 可惜yahoo blog摺左禾就搵唔返胡李媽媽, 有人知道新的網址嗎?

呢款伯爵茶葉係pre-blended TWG T3008 Earl Grey D'Amour, 有D花係入面, 好香好清新, 配魚類可能都適合呢.

朱古力粉仙女一直鐘意用佢, 夠濃唔苦唔酸, 但唔夠甜, 煮食好用就因為唔會太甜

蜜糖呢, 呢個醃汁既組合應該係”香味夠淡紅茶 + 濃味朱古力” 所以使用的蜜糖需要係偏甜的. IPC++ FoodLab係Gobby介紹的正野, 是一間採用本地農場直送食材, 烹調以蔬菜為主的健康創意菜式的概念餐廳. 由一班飲食、農業和科學的專家聯手創立, 他們深信健康飲食可以很美味和令人愉快, 是健康生活的開始.  本店在粉嶺, 新店係中環堅道. 呢樽蜜糖係屬於”百花蜜 Various Flower”, 唔好睇佢咁淺色, 甜到爆呀, 醃魚醃肉都應該適合.

做法:

(1)                以150ml熱水浸泡茶葉15分鐘 (不用煮, 滾水熄火焗就得, 怕太濃)

(2)               隔走茶葉, 加入朱古力粉攪拌至完全溶合. 試味, 如果有苦澀味就要加蜜糖(每次加一茶匙, 直至味道微甜不澀, 仙女加左2茶匙), 因為每個牌子的茶葉/朱古力粉/蜜糖會有好大分別, 試味呢一個步驟係必須的.

(3)               銀鱈魚+ 醃汁入密封袋, 抽真空之後入雪櫃, 醃一晚 (因為醃汁刻意淡淡的, 希望用抽真空醃法令味道浸入魚肉之內.  亦可以用厚身密實袋儘量擠走空氣)

(4)               取出魚柳以廚紙索去水份 (請保留醃汁), 用海鹽略醃

(5)               LC Skillet用油掃, 掃上極少量油 (因為銀鱈魚會出油, 掃油只因為唔想隻LC白燒). 中細火預熱, 幾分鐘出白煙之後, 轉小火, 放入魚柳, 二面煎香至脆

(6)               放魚柳在盤內, 預備煙槍, 用的”CHIPS”就係伯爵茶葉

(7)               以保鮮紙密封D ”煙”, 約15分鐘. 話明今次係做實驗, 所以一片魚柳煙燻, 另一片就咁食, 試一試不同效果. 大家見圖片就知道仙女係廳做煙燻,  大煙到不得了, 下次都要在廚房做煙燻才適合呢.

(8)               醃魚汁液用小煲煮沸, 試味 (怕加熱之後轉苦), 以豉油/白酒/糖調味, 濃縮至”掛汁”程度

(9)               伴上grill過的三色椒, 再加上薯仔沙律

效果 : 豐潤的銀鱈魚做呢D新口味係合適既, 因為魚油夠香, 可以平衡新奇口味的恐懼感, 使用燒得夠熱既黑PAN去煎, 面脆內嫩更易為人接受. 魚柳有伯爵茶同朱古力味道, 煙燻的一片更加濃味, 屬於成人的口味, 好特別. 最後deglaze的沾汁要偏鹹少少, 亦可以配tartar醬食用

下期3月1日題目係"米", 大家可以煲粥煮飯甜點burger, 可以中式西式日式, 好大空間呢.

其他朱古力菜式:
11R | Chocolate Beef Stew
Gobby | Chocolate Eclair
LiYou | Chewy Chocolate Rose Cookie
Irene | Oreo 木糠布
Yumi | 
Florence | 朱古力鬆餅