Ad Hoc Club (21) 越式魚片酸湯

仙女唔鐘意食魚, 主要係怕骨+怕腥, 今次既題目係”魚” 禾都用心想左好耐有咩可以做, 最後參考左”香港餐飲業食譜系列”, 煮左一味酸辣魚湯, 用左上次炆腩排剩下的酸子,搭配菠蘿, 湯頭酸甜味濃, 配鯇魚片都唔覺得腥, 禾食哂一大碗呢!

Ad Hoc : 越式魚片酸湯

材料:

鯇魚片300克, 魚上湯600ml, 蕃茄仔5粒, 菠蘿3片, 指天椒2隻, 酸子30g, 芽菜30g, 莞茜1條. (調味料: 魚露30ml, 白醋10ml, 砂糖1湯匙)

鯇魚片先以滾水汆燙, 撈起備用

上湯方面, 大家可以自制魚上湯, 禾知道好多有小朋友的家庭都會咁做, 一定比較健康. 否則可以用現成魚上湯或上湯粉, 仙女最近係ccsuper試左呢個韓國牌子既湯頭粉, 蝦/蟹都好出味, 魚/帶子就清淡一些, 總結係比史雲生/家樂牌好, 唔怕味精野既可以試下.

上湯煮滾, 轉小火之後放入酸子搗碎直至大概溶哂, 轉中火加入蕃茄/菠蘿/指天椒/調味料煮至再滾

轉小火上蓋煲10分鐘, 加入魚片/芽菜煮1分鐘, 放入莞茜熄火, 食得. 夏天食巧開胃, 亦唔會太辣, 喜歡辣既大可以加大指天椒既份量呢.  

下期Ad Hoc Club (Jul 1) "沙律", My Summer Favorite!